یاداشت بۆ سەرۆکی هەرێمی کوردستان (بۆ پاراستنی ئێستا وئایندەی گەل و کیانی ھەرێم)

جەنابی سەرۆکی هەرێمی کوردستان
ڕیزدار نیچیروان بارزانی
پاش سلاو،
لە سونگەی هەستکردن بە ئەرک بەرامبەر بە گەل و نیشتمان، بۆ پاراستن و سەرخستن و پێشخستنی ئەزموونی هەرێمی کوردستان لەم قۆناخە هەستیارەدا، ئەم ڕاوێژە پێشکەش دەکەم لە پێناوی: یەک بەرنامەی گفتوگۆ لە گەل لایەنی عیراقی لە سایەی یەکڕیزیی و یەکهەلوێستیی هیزە سیاسییە پەرلەمانییەکانی کورد – وبۆ دەرچوون لە گێژاوی پەرتەوازەیی – لە بەرامبەر بریاربەدەستان و دامەزراوە سیاسیی و دادوەرییەکانی عیراق، ئێستا ولە چوار سالی داهاتوو دا، بە یەک بەرنامەی هاوبەش و کارا.
جەنابی سەرۆک، ئەگەر پێشنیاری من بۆ (م. س.) لە ناوەراستی تەموزی (٢٠٠٥)، سەبارەت بە چاککردنی میکانیزمی سەقەتی ماددەی (٥٨)ی یاسای ئیدارەی دەولەتی عیراق بۆ قۆناخی گواستنەوە – واتە بڕگەی (ب)- پێش ئەوەی ببێتە ناوەرۆکی ماددەی (١٤٠)ی دەستووری هەمیشەیی، لە لایەن گروپی کوردی لیژنەی دانانی دەستووری ئیتیحاددی بایەخی پێدرابوا؛ وئەگەر پێشنیاری من لە (١٥)ی ئەیلولی (٢٠١٧) سەبارەت بە ڕیفراندۆم (بە پەسەندکردنی دەستپێشخەریی ئەمریکاوهاوپەیمانان وەک ئەلتەرنەتیڤ بۆ دواخستنی ڕیفراندۆم بۆ ماوەی سالێک) ڕاچاو کرابوا – کە هەردووک جار بۆ ڕادەربرین لەسەر داوای مەکتەبی سەرۆکی هەرێم کاک مەسعود بارزانی بۆ (م.س.) بانگ کرام، دلنیام لەوەی کە ئاکامی هەردوو پرس زۆر باش دەبوو؛ چونکە من لە ڕووی تیورییەوە (وەک مامۆستای پەیوەندیی نێودەولەتی لە کۆلێجی یاسا و سیاسەت – زانکۆی سەلاحەددین) هەموو زانیاریی و شارەزایی خۆم: لە زانستەکانی سیاسەت و یاسا و پەیوەندی نێودەولەتی (بەتایبەتی بابەتی ئیدارەی تەنگژەی نێودەولەتیی – إدارة الأزمة الدولية، کە چوار سال لە کۆرسی پەیوەندی نێودەولەتیی دکتۆرا پێشکەشم کرد) و توانستەکانم لە زمانەکانی عەرەبی وئینگلیزیی وئەلمانی تێدا وەگەڕخستبوو، و لە ڕووی کردەییشەوە پشتئەستوور بووم بە خەباتی (٣٥) ساڵ کوردایەتی مرۆڤپەروەرانە لە ڕیزەکانی یەکێتی قوتابیان و پارتی و شۆڕشی ئەیلول و (٥) ساڵ دوورخستنەوە (نفي) بۆ باشووری عیراق و پاشانیش چەندین ساڵ (بە سەربەخۆیی) لە ئاوارەیی ئەوروپا، و بە دانانی ١١ کتێب و ئەنجامدانی ١٠ توێژینەوە ونووسینی سەدان گوتار لەسەر دۆزی کورد و نەهامەتیی خەلکی عیراق (بە چوار زمان)، بەلام بەداخەوە هەردوو جار دەنگم وەک هاوارێک بوو لە خەرەندی رواندز!
بەهەرحاڵ، من قەت لە ژیانم کۆلنادەم و سوورم لەسەر ئەوەی بە هەموو شێوەیەکی دروست بەرگری لە هەق بکەم، بە تایبەتی سەبارەت بە دۆزی ڕەوای کورد و حوکمرانی دادپەروەرانە و بنەماکانی ئاشتی و پێکەوەژیان. لە نێوان ساڵانی (٢٠٠٥ – ٢٠٢٠) لەپاڵ خزمەتی ئەکادیمیی و کۆمەلایەتیم (بەپێی توانا و بە ویژدانێکی ئاسوودە)، چەندین ڕاوێژیی خۆبەخشانەم لە بارەی پرسە هەستیارەکان، پێشکەشی دیوانی ئەنجومەنی وەزیران و پەرلەمانی کوردستان و وەزارەتی ناوچەکانی دەرەوەی ئیدارەی هەرێم وفەرمانگەی پەیوەندییەکانی دەرەوە کردوون (لەسەر داوای خۆیان)، لە پێناوی بەرژەوەندیی نیشتمانیی باڵا (بێ بەرامبەری ماددی).
هیوادارم ئەم تێبینی و پێشنیارەی ئەم جارەشم سوودبەخش بێت و بایەخی شایستەی پێبدرێت.
لەکۆتایی دا، تکایە لە هەموو جێگە وکاتێک، کەسانی شارەزای خۆیی و دلسۆز و خۆبەخش سوودبەخشترن بۆ ڕاوێژ لە پرسە ژیارییەکان لە کەسانی ناپسپۆری خۆیی (ئەگەر لە مێژیش بێت حزبی بن) و لە کەسانی بیانی نەشارەزا لە هەل و مەرجی ولات (ئەگەر دۆستی کوردیش بن)، چونکە سیاسەت و دیپلۆماسیەت و ئیدارەی تەنگژە تەنیا لە چوارچێوەی زانست و واقیعیەت (وبە ڕاوێژی دروست، لەکاتی گونجاودا) سەرکەوتوو دەبن.
ڕاوێژێک لەپێناوی بەرنامەیەکی هاوبەشی گفتوگۆی کورد لەگەل لایەنی دروستکەری حکومەتی داهاتووی عیراق
ئاشکرایە، ئەگەر هەموو یان زوربەی حزبە کوردستانییە براوەکان لە هەلبژاردنی ئەم جارەی ئەنجومەنی نوێنەرانی عیراق بیانەوێت ئەم دەرفەتە بۆ بەرژەوەندی بالای گەل و کیانی هەرێمی کوردستان بقۆزنەوە، دەبێت پێکەوە یەک فراکسیۆن یان بەلای کەم یەک هاوبەندیی پێکبهێنن، تا بتوانن بە شیوەیەکی دروست و کاریگەر واتە بەیەک ڕیزیی و یەک هێز و یەک بەرنامە داوا ڕەوا و لە پێشینەییەکانی گەل و نیشتمان بچەسپێنن ودەستەبەر بکەن.
سەرەتا لە گفتوگۆ لەگەل ئەو لایەنە عەرەبە شیعییەی سەرۆکایەتی حکومەتی ئیتیحادیی و سەرۆکایەتی هێزە چەکدارەکانی عیراق دەگرێتە دەست، واتە حوکمرانی عیراق بۆ چوار سالی داهاتوو دەکات، دەبێت ئەو خالانەی خوارەوە داوای لەپێشینە (ئەولەویات)ی لایەنی کوردی بن لە کاتی دانوستان، چونکە پەیوەستن بە مافە ڕەوا و هەنووکەیی و ژیارییەکانی گەلی هەرێم و بە ئاییندەی کیانی هەرێمی کوردستان.
بە ڕای من دەبێت مەنسەبی (دەسەلات سنوورداری) سەرۆک کۆمار و ژمارەی وەزیر و بەڕێوەبەری گشتی بۆ چەند کەسێکی حزبەکان داوای لاوەکی واتە پلە دوو بن، چونکە بە ڕاشکاویی چەندین سالە نوێنەرانی کورد لە بەغداد – جگە لە مووچە و ئیمتیازاتی خەیالی شەخسی خۆیان – هیچ دەسەلاتێکی یەکلایی کەرەوەی مافە ڕەوا و زەفتکراوەکانی گەلی کوردیان نەبووە؛ و لەبەرئەوەی مافە بنەڕەتییەکانی گەل و نیشتمان زۆر لە مەنسەب و مەکسەب بۆ چەند لایەنێک یان چەند کەسێک گرنگتر و لە پێشترن. هەروەها نابێت لە دەزگاکانی ڕاگەیاندن (کە هەر هەموویان حزبین) هەراو ریکلام و پروپاگاندە لەم بارەیەوە لە دژی یەکدیی بکرێت، ئەگەرنا زۆرینەی گەل زیاتر لە ئێستا لە سیاسەتوانان نارازی و لە سیاسەت بێزار دەبێت (رێژەی بەشداریی نەکردنی گەل لە هەلبژاردن هێمایەکی ئاشکرایە بۆ بێزاری خەلک لە سیاسەت – لە گشت ولاتانی جیهان بە گشتیی و لە عیراق و هەرێم بەتایبەتی):
١- سەبارەت بە ناوچە دابڕێندراو و “کێشەلەسەرەکان” (المناطق المُتنازع عليها)
أ)- بۆ ئاسایی کردنەوەی بارودۆخی شێواوی “ناوچە کێشەلەسەرەکان”، کە پرسی سەرەکیی هەرێم وگرفتی سەرەکیی نێوان حکومەتی هەرێم و حکومەتی ئیتیحادییە، پێویستە هەردوو حکومەت – بە زەمانەتی نوێنەری نەتەوەیەکگرتووەکان لە عیراق – رێکبكەون: لەسەر هەڵسوڕاندنی ئیدارە و پاراستنی ئاسایشی ناوچەکان بە شێوەیەکی هاوبەش و لەڕێگەی کارمەندی ئیداریی و هێزی لەشکریی هاوبەش (سوپای عیراق و هێزی پێشمەرگە و پۆلیسی خۆجێیی)، و بە گەڕاندنەوەی ئاوارە کوردەکان بۆ گوند و سەر ماڵ و زەوییەکانی خۆیان و قەرەبووکردنەوەی زەرەرمەندانی ئاوارەیی هێرشی ناوەڕاستی ئۆکتۆبەری ٢٠١٧ ی حکومەتی عەبادی، بە تایبەتی ئاوارەکانی دەڤەری دووزخۆرماتۆ و کەرکوک و قەراج، و سزادانی تاوانباران بە پێی هەڵسەنگاندن و ڕاسپاردەی لیژنەیەکی لێکۆڵینەوەی هاوبەش لە نوێنەرانی هەردوو حکومەت و بە پشتبەستن بە یاسای سزادانی عیراقی.
ب)- لە پێناوی تەواوکردنی جێبەجێکردنی چارەسەریی کۆتایی پرسی “ناوچە کێشەلەسەرەکان” بە گشتیی، دەبێت حکومەتی هەرێمی کوردستان و‌حكومه‌تی ئیتیحادیی عیراق ڕێکبکەون لەبارەی کۆتایی پێهێنانی چارەسەریی پرسەکە (بە تەواوکردنی جێبەجێکردنی ماددەی ١٤٠ی دەستوور) لە ماوەیەکی زه‌مه‌نی دیاریکراوی نوێ دا – بۆ نموونە یەک ساڵ، ڕێکەوتنەکەش وەک خاڵێک لە بەرنامەی حکومەتی ئیتیحادی عیراقی داهاتوودا بچەسپێندرێت؛ هەروەها ڕێکبکەون لەسەر پێکهێنانی لیژنەیەکی هاوبەش لە نوێنەرانی هەردوو حکومەت بۆ کار و ئەرکی بەدواداچوونی بەردەوام بۆ جێبەجێکردنی چارەسەرییەکە لە ماوەی دیاریکراوی نوێ دا.
ج)- بەمەبەستی هاوکاریی زیاتر بۆ بەدواداچوونی کاریگەر بۆ چارەسەریی کۆتایی پرسی “ناوچە کێشەلەسەرەکان”، پێویسته‌ ده‌سته‌ی گشتی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێمی كوردستان كارا بكرێت و ئەرک و بەرپرسیارییەکانی بە وردی دیاربکرێن. بۆ هاوکاریی کردنیشی وا باشە (لیژنەیەکی ڕاوێژکاریی) تایبەت لە پسپۆرانی شارەزا لەم پرسە پێکبهێنرێت، بۆ ئەوەی دەستەکە رۆڵێکی دیاری هەبێت لە ئەرکی به‌دواداچوونی کردەیی، هەم سەبارەت بە ئاسایی کردنەوەی دۆخی شلەژاوی “ناوچە کێشەلەسەرەکان” بەپێی خالی یەکەمی ڕێکەوتن، وهەم بۆ بەدواداچوونی تەواوکردنی جێبەجێکردنی چارەسەریی دەستووریی کۆتایی پرسەکە، بەپێی رێکەوتنی نوێی هەردوو حکومەتی هەرێم و ئیتیحادی لە ماوەی نوێ دا.
ء)- ده‌كرێت گرفتی قه‌زای مه‌خموور وه‌ك سه‌ره‌تایه‌ك بۆ جێبه‌جێكردنی چارەسەریی دەستووریی پرسی “ناوچە کێشەلەسەرەکان”، به رێكەوتنی تایبەت لە نێوان هەردوو حکومەتی هەرێم و ئیتیحاددی لە ئەنجامی گفتوگۆی داهاتوو، وەک سەرەتایەکی نوێ و فاکتەرێکی پەیداکردنەوەی متمانە لە نێوان هەردوو حکومەت دا و وەک دەستکەوتێکی ئەرێنی دیکە بۆ خەلک و خاکی هەرێم چاره‌سه‌ر بكرێت، و قەزاکە بگه‌ڕێته‌وه‌ چوارچێوەی پارێزگای ئەسلی خۆی پێش دابڕاندنی (هەولێر)، کە رژێمی بەعس لە تۆلەی دامەزراندنی “هەرێمی کوردستان” دایبڕاند؛ وچونکە سروشتی گرفتی قەزای مه‌خموور جیایه‌ له‌ ناوچه‌ كێشه‌له‌سه‌رەکانی دیکە و‌ تا ساڵی ١٩٩٦ لە هەولێر جیا نەکراوەتەوە، و بێ مه‌رسوومی كۆماری له‌ پارێزگای هه‌ولێر دابڕێندراوه‌ و به‌ پارێزگای نەینەواوە لكێندراوه‌. ئەم ئەگەرە نابێت بە بیانووی بەستنەوەی بابەتی قەزاکە بە کۆی گشت ناوچە دابڕێندراوەکان رەتبکرێتەوە، چونکە بە پێی بنەماکانی زانستی سیاسەت و شێوازەکانی هونەری دیپلۆماسیەت “سیاسەتی: یان هەموو یان هیچ”، هیچ بۆ لایەنی لاواز مسۆگەر دەکات.
پێویستە ڕێکەوتن لەسەر ئاسایی کردنەوەی ڕەوشی نالەباری “ناوچە کێشەلەسەرەکان”، و ڕیکەوتن لەسەر تەواوکردنی جێبەجێکردنی چارەسەریی دەستووریی پرسی “ناوچە کێشەلەسەرەکان” (بەپێی ماددەی ١٤٠) لە ماوەیەکی دیاریکراوی نوێ، وەک دوو خالی سەرەکی لە بەرنامەی حکومەتی ئیتیحاددی داهاتووی عیراق بچەسپێندرێن، وئەم جارە بە جیددی و لە لایەن لێژنەیەکی بەدواداچوونی جێبەجێکردنی چارەسەرییە دەستوورییەکە و بە پێی خالەکە و بە ئاگاداریی نوێنەری نەتەوەیەکگرتووەکان چاودێریی جێبەجێ کردنی بکرێت.
٢- سەبارەت بە شێوازێکی گونجاو بۆ چارەسەرکردنی مەلەفی ئالۆزیی نەفت وگاز، بەتایبەتی پاش دەرچوونی بڕیاری دادگەی ئیتیحاددی لەم بارەیەوە، پێویستە بەزووترین کات لێژنەیەکی یاسایی – ئابووریی – سیاسی لە پسپۆران و شارەزایانی لێهاتوو و شیاو پێکبهێنرێت، و دەستبکات بۆ ئامادەکردنی مەلەفی بەرگریکردن لە مافە دەستووریی و فیدرالییەکانی گەل لە هەرێمی کوردستان، بە چاکترین شێوە واتە بۆ گەیشتن بە ڕێکەوتنێکی هاوبەش بە کەمترین زیان بۆ هەرێم، بگرە بۆ گەڕاندنەوەی بەشیک لە دەسکەوتی زۆری کۆمپانیاکان و ترانسێت و شێوازی ناچاری فرۆشتنیان، بۆ گەل وحکومەتی هەرێم و چەسپاندنی بەشی ڕەوای هەرێم لە بودجەی ئیتیحاددی، لە دانوستان لەگەل لێژنەی تایبەتی وەزارەتی نەفتی ئیتیحاددی کە بۆ ئەم مەبەستە لە لایەن حکومەتی ئیتیحادی پێکدەهێنرێت. واچآکە بە هاوکاریی حکومەتی ئیتیحاددی و لەبەر ڕۆشنایی: ماددەی (١١٢)ی دەستووری عیراق و بە پەیڕەوکردنی پرینسیپی فیدرالیی: (هاوبەشیی دەسەلات و سامان)، گرفتەکە چارەسەربکرێت؛ واتە گشت گرێبەستەکانی کۆمپانیاکانی دەرهێنان و بەبازارکردنی نەفت و گازی هەرێم – بە گرێبەستی کۆمپانیای دانە غازەوە – هەموار بکرێنەوە، چونکە ئاشکرایە گرێبەستەکان لە هەلومەرجی سەخت و بە شێوەی بەشداریی (sharing) و بەپەلە ئەنجام دراون، و هەرێم تێیدا زۆر زەرەرمەندە (بۆیە بەم شێوەیە چەند سالە نیوەی دەسکەوتی نەفت و گازی هەرێمی کوردستان بۆ کۆمپانیاکان دەروات)، وئەگەر بەم شێوەیەی ئێستاش بمێنن – هەروەک من لە توێژینەوەیەک کە لە سالی ٢٠١٢ لە زانکۆی ئێرفورت لە ئەلمانیا ئەنجامم داوە بۆم دەرکەوتووە، هەرێم پتر زەرەر دەکات و دەشکەوێتە بن باری سەختی قەرزی ئەو کۆمپانیایانە، وناشتوانی بگاتە ڕێکەوتنێکی کۆتایی و هەمیشەیی لەگەل وەزارەتی نەفتی حکومەتی ئیتیحاددی، و ئەمەش دەبيتە لەمپەر لە پێش چارەسەرییەکی دروستی بودجەی هەرێم و چاکتر کردنی پەیوەندیی نێوان هەردوو حکومەت. جگە لەمەش ئێستا کۆمپانیاکانیش پاش دەرچوونی بڕیاری دادگەی ئیتیحاددی لەم بارەیەوە مشووری خۆیان دەخۆن، بۆیە پێویستە لیژنەی هەرێم گفتوگۆ و هەماهەنگی لەگەل کۆمپانیاکان و لایەنە پەیوەندیدارەکانی دیکەش لەم بارەیەوە بکات و دلنیایان بکات، لە گەیشتن بە ڕێکەوتنێک لەگەل حکومەتی ئیتیحاددی عیراقی کە لە بەرژەوەندی هەموو لایەک بێت. هەروەها پێویستە لەم خولەی ئەنجومەنی نوێنەران یاسای نەفت و گازی ئیتیحاددی دەربچێت – بە پشتبەستن بە ڕەشنووسی یاساکە، ئی سالی ٢٠٠٧، چونکە بەشێکی زۆری گرفتەکان لەگەل هەرێم لە بواری سامانی سروشتی چارەسەر دەکات.
٣- سەبارەت بە بودجەی هەرێمی کوردستان کە پەیوەستە بە بژێوی ژیانی هاولاتیان بە تایبەتی مووچەی کارمەندانی هەرێم، و بزوێنەری ئابووریی هەرێم و ستوونی سەرەکیی خزمەتگوزارییە لە هەرێم، دەبێت هەول بدرێت بە شێوازێکی دروست و هەمیشەیی چارەسەر بکرێت، و چارەسەرییەکەش وەک خالێک لە بەرنامەی حکومەتی داهاتوو بچەسپێندرێت – بە شاهیدیی و زەمانەتی نوێنەری نەتەوەیەکگرتووەکان لە عیراق.
٤- سەبارەت بە دامەزراندنی یەک لەشکری یەکگرتوو بۆ هەرێم “هێزی پاسەوانی هەرێمی کوردستان”، کە دەستووری عیراق ڕێگەی پێداوە، پێویستە ڕێکەوتنێک لەسەر شێوازی هاوکاری کردنی حکومەتی ئیتیحاددی لەم بارەیەوە بکرێت، تا دامەزراندنی هێزەکە بە پشتیوانی و لەسەر بناخەی یاسایەکی پەرلەمانی کوردستان: “یاسای خزمەتکردنی لەشکریی ناچاریی” (کە پێویستە بە زووترین کات لە پەرلەمانی کوردستان دەربچێت) و بە سەرپەرشتی وەزارەتی پێشمەرگەی هەرێم و هاوکاریی وەزارەتی بەرگریی ئیتیحادیی عیراق و بە هەماهەنگی لەگەل هاوپەیمانان، بە هەل و مەرج و ژمارە و پلەداری گونجاو دابمەزرێت، ولە هێزی تایبەتی دوو حزبی کوردیی ببنە سوپای هەرێمی کوردستان، و تا سەربازەکان و ئەفسەرەکان (پێشمەرگەکان)یش هەمان ماف و تایبەتمەندییەکانی سەرباز و ئەفسەری سوپای عیراق بەدەستبهێنن.
٥- سەبارەت بە پۆستی پارێزگاری کەرکوکیش دەبێت بە کۆدەنگیی و دوور لە میدیا و لە بەرژەوەندیی تەسک، کەسایەتییەکی کوردی لێهاتووی پارێزگاکە ڕابسپێردرێت و لەبەرامبەر کێبرکێی (بەربژێرانی) عەرەب و تورکمان پشتیی بگیرێت، بە ڕاچاوکردنی دابینکردنی دادپەروەریی بۆ هەموو دانیشتووانی پارێزگاکە و گشت گەڕەک و ناوچەکان بێ جیاوازیی نەتەوەیی و ئایینیی (مەرج نییە حزبیی بێت، بەلکو باشترە ئەگەر کەسایەتییەکی نیشتمانپەروەرو سەربەخۆ و ئازا و پەسند بێت، کە بە ئاسانی کۆدەنگیی کوردی لەسەر دەکرێت و پێکهاتەکانی دیکەش پێی ڕازی دەبن).
لە بواری ناوخۆییشەوە بۆ زەمینەسازیی سەرخستنی داوا رەواکانی سەرەوە و پتەوکردنی کیانی هەرێم: پێویستە حزبە پەرلەمانییەکان بە کردەیی جەخت لە تەبایی بکەنەوە، و نابێت کێبرکێی سیاسییان لە دەزگاکانی ڕاگەیاندن بە شێوەی پرۆپاگاندە دژی یەکدی ڕەنگبداتەوە.
حکومەتی هەرێمی کوردستانیش دەبێت بە کردەیی و بە ڕێکاریی هەستپێکراو – لە لایەن گەل – بەرنامەی چاکسازیی جێبەجێ بکات، چونکە تەبایی و چاکسازیی گرنگترین و بەهێزترین ئامراز و چەکی پاراستن و پێشخستنی کیانی هەرێمی کوردستانن و دابینکەری ئارامیی و پێکەوەژیان و خۆشگوزەرانی خەلکەکەن.
هەروەها پێویستە حکومەتی هەرێم بە ستراتیجیەتێکی گونجاوی (ڕاهێنانی پیشەیی لاوان) و (هۆشیارکردنەوە و کاراکردنی کۆمەلگە) و (پشتیوانی بە پێشینە و ئاسانکاریی لە پیشە و پیشەسازیی بچووک) ڕێگە لە شەپۆلی دەرچوونی لاوانی کوردستان بۆ ئاوارەبوون و ئاییندەی نادیاربگرێت، چونکە نەزیفی لەدەستدانی لاوان گورزێکی کوشندەیە لە سەرخان و نەسیجی کۆمەلایەتی هەرێمی کوردستان، و لە توانای مرۆیی وئابووریی و بەرگریی هەرێمی کوردستان.
لە کۆتایی دا، بێگومان بە پەرتەوازەیی هێز وتواناکانی گەل و بە بەهەدەردانی سامان و داهاتەکانی نیشتمان گەل و کیانی هەرێم لاوازتر دەبن و داگیرکەرانیش زاڵتر و چەوسێنەرتر دەبن، وئاسۆ و پاشەرۆژی گەل و نیشتمانیش لێل و مەترسیدار دەبن. تەنیا بە یەکڕیزیی و لە سایەی کۆی هێزوتواناکانی هەرێم: داوای حزبە سیاسییەکان سەبارەت بە ماف و شایستە دەسستوورییە ڕەواکانی گەلی کورد لەبەرنامەی حکومەتی داهاتووی عیراق جێگیر و بە ڕیکاری کردەیی دەستەبەر دەکرێن، وتەنیا بە چاکسازیی کردەیی کیانی هەرێم دەپارێزرێت و پێشدەکەوێت و سەنگ و پێگەی لە لایەن دۆست و نەیاران پتەو دەبن.
لەگەل ڕێز
براتان د. ئازاد عوسمان
١٦ شوبات ٢٠٢٢